Tuesday, November 30, 2021
spot_img

एमालेको १०औं राष्ट्रिय महाधिवेशन आजबाट शुरु हुँदै

चितवन, १० मंसिर । नेकपा एमालेको १०औं राष्ट्रिय महाधिवेशन आज चितवनमा सुरु हुँदैछ। महाधिवेशनका लागि सबै तयारी पूरा भैसकेका छन । पार्टी अध्यक्ष केपी शर्मा ओली शर्मासहित शीर्ष नेताकार्यकर्ता बिहीबार चितवन आइसकेका छन । तुल, ब्यानर, झन्डाले चितवन झकिझकाउ बनेको छ।

महाधिवेशन उद्घाटन स्थल सिँगारिएको छ। ध्वजापताका टाँगिएका छन्। भरतपुरका ठाउँठाउँमा स्वागत गेट बनाएर ब्यानर टाँगिएका छन्। आज दिउँसो १२ बजे भरतपुरस्थित नारायणी नदी किनार मैदानमा महाधिवेशन उद्घाटन कार्यक्रम हुनेछ।

‘पाँच लाख कार्यकर्ता उद्घाटन सत्रमा सहभागी हुनेछन्’, महाधिवेशन प्रचार समिति संयोजक योगेश भट्टराईले भने, ‘नारायणी नदी किनारमा शुक्रबार मानव सागर उर्लनेछ ।’ उनका अनुसार महाधिवेशन उद्घाटनअघि गैंडाकोट र भरतपुरका गरी विभिन्न सात स्थानबाट र्‍याली निकालिनेछ। चितवनमा ठूलो संख्यामा कार्यकर्ता उतार्न एमालेले जिल्ला–जिल्लाबाट बस रिजर्भ गरेर ल्याएको छ।

भरतपुर बजार क्षेत्रमा सडकका डिभाइडरमा पनि झन्डा टाँगिएका छन्। बन्दसत्र स्थल सौराह पनि झकिझकाउ बनेको छ। होटलहरुमा चहलपहल बढेको छ। महाधिवेशनमा सहभागी हुन आएका नेता–कार्यकर्ताको चापका कारण सवारी व्यवस्थापन गर्न प्रहरीलाई हम्मेहम्मे परेको छ।

सुरक्षा व्यवस्था कडा पारेको चितवनका प्रहरी प्रमुख एसपी ओम अधिकारीले बताएका छन। साबिकभन्दा थप सुरक्षाकर्मी परिचालन गरिएको उनले जानकारी दिए ।

महाधिवेशनको उद्घाटन सत्रमा सहभागी हुन प्रधानमन्त्री एवं नेपाली कांग्रेसका सभापति शेरबहादुर देउवा, जनता समाजवादी पार्टीका अध्यक्ष उपेन्द्र यादव, लोकतान्त्रिक समाजवादी पार्टीका अध्यक्ष महन्थ ठाकुर, राप्रपाका अध्यक्ष कमल थापासहित अन्य दलका नेता आउने एमालेले जनाएको छ।

महाधिवेशनमा नेकपा एकीकृत समाजवादीलाई भने निम्तो नदिइएको प्रचार विभाग प्रमुख भट्टराईले बताएका छन। उनले नेकपा माओवादीका अध्यक्ष पुष्पकमल दाहाललाई बोलाइएको तर आउने नआउने निश्चित नभएको बताएका छन।

उद्घाटन स्थलमा करिब पाँच सय जना अट्ने मञ्च तयार भएको छ। निकै आकर्षक रूपमा सिंगारिएको मञ्चको तस्बिर खिच्न बिहीबार बिहानैदेखि एमाले नेता–कार्यकर्ताको घुइँचो लागेको थियो । मञ्चमा हुने गतिविधि हेर्न मिल्नेगरी उद्घाटन स्थल नारायणी किनार आसपास डिस्प्ले बोर्डहरु राखिएका छन्।

सबैजनाले उद्घाटन स्थलमा पुगेर कार्यक्रम हेर्न नसक्ने भएकाले गैंडाकोट र नारायणगढ बजारका विभिन्न ठाउँमा डिजिटल बोर्ड राखेर उद्घाटन सत्रका कार्यक्रम हेर्न सक्ने व्यवस्था मिलाइएको भट्टराईले बताएका छन। उद्घाटन स्थलमा सेल्फी प्वाइन्ट पनि निर्माण गरिएको छ। उद्घाटन स्थलमा पाँच हजार स्वयंसेवक परिचालन गरिने एमालेले जनाएको छ। उनीहरू सडक र मञ्च आसपास आवश्यक व्यवस्थापनका लागि खटिनेछन्।

महाधिवेशन बन्द सत्रमा मनोनीत एक सय ६ सहित दुई हजार एक सय ७५ जनाप्रतिनिधि सहभागी हुनेछन्। एक सय तीनजना पर्यवेक्षक पनि सहभागी हुनेछन्। महाधिवेशनमा विभिन्न देशका प्रतिनिधि पनि आउनेछन्। सफलताको शुभकामनासहित चिनियाँ कम्युनिस्ट पार्टीको भिडियो सन्देश आइसकेको भट्टराईले बताएका छन।

‘महाधिवेशनमा सहभागी हुने प्रतिनिधि र पर्यवेक्षकका लागि दुई साताअघिदेखि नै तीन हजार पाँच सय बेड रिजर्भ गरेका छौं’, आवास संयोजक कृष्णभक्त पोखरेलले भने। सबै तयारी अन्तिम चरणमा रहेको जानकारी दिँदै उनले महाधिवेशनमा सहभागीलाई आवासको कुनै समस्या नहुने बताएका छन।

बन्द सत्र शनिबार बिहान ८ः३० बजे सुरु हुने उनले बताए। बन्द सत्रमा पनि अध्यक्ष ओली र केही विदेशी पाहुनाले स्वागत सम्बोधन गर्ने तय भएको छ। शनिबार साँझ ६ः३० बजे उम्मेदवारको अन्तिम नामावली प्रकाशन गरिने भट्टराईले बताएका छन। महाधिवेशनपछि एमालेले पार्टीलाई स्थानीय, प्रदेश र संघीय चुनावमा केन्द्रित गराउने महाधिवेशन प्रचार समिति संयोजक योगेश भट्टराईले जानकारी दिएका छन ।

सम्बन्धित समाचार

प्रतिक्रिया

Please enter your comment!
Please enter your name here

ताजा समाचार