Tuesday, September 28, 2021
spot_img

सुदूरपश्चिम एमालेका १३ सांसद् एकीकृत समाजवादी पार्टीमा

धनगढी, १५ भदौ । नेकपा (एमाले) सुदूरपश्चिम प्रदेशसभाका १३ जना सांसद् नवगठित नेकपा (एकीकृत समाजवादी) पार्टीतिर लागेका छन् । भौतिक पूर्वाधार विकासमन्त्री दीर्घ सोडारीको नेतृत्वमा एमालेका १३ जना सांसद् माधव नेपाल नेतृत्वको नेकपा (एकीकृत समाजवादी) मा लागेका हुन् ।

दल विभाजनसम्बन्धी अध्यादेशअनुसार एमालेका प्रदेश र स्थानीय तहका जनप्रतिनिधिले २१ दिन अर्थात २२ भदौसम्म कुन दलमा जाने भनेर निर्णय लिने समय छ ।

सुदूरपश्चिममा मंगलबारै १३ जना सांसद्ले माधव नेपालको नेकपा (एकीकृत समाजवादी) मा सनाखत गर्न लागेका हुन् ।

सनाखत गर्नेमा सोडारीसहित, आन्तरिक मामिला तथा कानुनमन्त्री पूर्णा जोशी, सामाजिक विकासमन्त्री लालबहादुर खड्का, सांसद्हरु बलबहादुर सोडारी, अम्मर साउद, चुनकुमारी चौधरी, मना साउद, तारालामा तामाङ, अर्चना गहतराज, कुलवीर चौधरी, सुशीला बुढाथोकी, दुर्गा कामी र माया भट्ट छन् ।

प्रतिनिधिसभा विघटनपछि माधव नेपाल समूहमा उभिएका १७ मध्ये १३ जनाले नयाँ पार्टीमा जाने निर्णय गरेका हुन् । यसअघि माधव समूहमा रहेका एमाले संसदीय दलका नेता प्रकाश शाह, प्रकाश रावल, पूर्वमन्त्री कृष्णराज सुवेदी, गोविन्द कुँवरले भने नयाँ पार्टीमा नजाने बताएका छन् । उनीहरु एमाले उपाध्यक्ष भीम रावल निकट मानिन्छन् । रावल माधवलाई छाडेर एमालेमा फर्किएका छन् ।

अहिले नेकपा (एकीकृत समाजवादी) मा जान चाहने प्रदेशसभा सदस्यको हस्ताक्षर अभियान सञ्चालन भइरहेको छ । हस्ताक्षर सकिएलगत्तै प्रदेश निर्वाचन आयोगमा सनाखत गराइने नेकपा एसकी केन्द्रीय सदस्य तथा आन्तरिक मामिला तथा कानुनमन्त्री पूर्णा जोशीले बताइन् । “आज नभए भोलिसम्म निर्वाचन आयोगमा हस्ताक्षर बुझाउँछौं,” उनले भनिन् । सुदूरपश्चिममा एमालेका सभामुखसहित २५ सांसद छन् ।

सम्बन्धित समाचार

प्रतिक्रिया

Please enter your comment!
Please enter your name here

ताजा समाचार