१५ माघ २०७७, बिहीबार

पशुपतिका संरचना विकास गरिने

काठमाडौं, १७ मंसिर । संस्कृति, पर्यटन तथा नागरिक उड्ययनमन्त्री योगेशकुमार भट्टराईले विश्वभरका धार्मिक पर्यटकलाई पशुपति क्षेत्रमा भित्र्याउने गरी विकास निर्माणका काम अघि बढाउन लागिएको बताएका छन् ।

पशुपति क्षेत्र विकास कोष र एभरेष्ट बैंकले बुधबार संयुक्त रुपमा आयोजना गरेको वातावरणमैत्री शवदाह गृह हस्तान्तरणका अवसरमा उनले प्रस्तावित गुरुयोजनालाई अन्तिमरुप दिन मन्त्रालयले प्राविधिक समिति गठन गरेको जानकारी दिएका छन । समितिले स्थानीयवासीलगायत सरोकार निकायसँग छलफल गरी तीन महिनाभित्र मन्त्रालयमा प्रतिवेदन बुझाउनुपर्ने छ ।

“मन्त्रिपरिषद्ले स्वास्थ्य सुरक्षाका विधि अपनाएर धार्मिक, सांस्कृतिक सम्पदालाई खुला गर्ने निर्णय गरेको छ, कोरोना संक्रमण नफैलने गरी कोषले दर्शनार्थीलाई मन्दिर प्रवेश गराउनेछ”, उनले भने । कोषका सदस्य सचिव डा प्रदीप ढकालले पशुपति क्षेत्रमा शवदाह गर्नेको सङ्ख्या बढ्न थालेकाले विभिन्न संघसंस्थासँगको सहकार्यमा शवदाह गृह बढाउन लागिएको बताएका छन ।

वातावरणमैत्री शवदाहगृहमा १ सयदेखि १ सय ५० केजी दाउरामा शव जलाउन सकिने छ । हाल भष्मेश्वर र आर्यघाटमा शव जलाउँदा कम्तीमा ४ सय केजी दाउरा लाग्ने गरेको कोषका कार्यकारी निर्देशक डा घनश्याम खतिवडाले जानकारी दिएका छन ।

बैंकले रु ७५ लाखको लागतमा शवदाहगृह निर्माण गरी बुधबार कोषका सदस्य सचिव ढकाललाई हस्तान्तरण गरेको हो । शवदाहगृह हस्तान्तरण गर्दै बैंकका प्रमुख कार्यकारी अधिकृत जिके नेगीले कम दाउरा लाग्ने र वातावरणमैत्री भएकाले यसको माग देशभर भइरहेको बताएका छन ।

बैंकले यसअघि पोखरा र भैरहवामा पनि यस्तै शवदाह गृह निर्माण गरी प्रदेश सरकारलाई हस्तान्तरण गरिसकेको जनाइएको छ । यो शवदाह गृहमा शव जलाउन पनि कम समय लाग्नेछ एकदेखि सवा घण्टामा शव जलाइ सकिने कोषले जनाएको छ । भष्मेश्वरघाटतिर भने एउटा शव जलाउन कम्तीमा पनि तीन घण्टा लाग्छ ।

यो यन्त्रमा शवदाहबाट निस्कने धुवाँ भिजेको चिम्नी हुँदै जाने व्यवस्था मिलाइएकाले बाहिर पुग्नु अघि नै शुद्धीकरण भइसक्ने बैंकका प्रमुख कार्यकारी अधिकृत नेगीले बताएका छन । पशुपति क्षेत्रको आर्यघाट र भष्मेश्वर घाटमा गरी १८, विद्युतीय शवदाहगृहमा दुई, वातावरणमैत्री एक गरी तीनवटा शवदाह गृह सञ्चालनमा छन् । विद्युतीय शवदाह गृहमा एउटा यन्त्र थप्ने तयारी भइरहेको कोषले जनाएको छ ।

कोभिड–१९ बाट निधन भएकाको शव विद्युतीय शवदाह गृहमा जलाउने गरिएको छ । आजैदेखि सञ्चालनमा आएको वातावरणमैत्री शवदाह गृहमा पनि कोभिड –१९ बाट निधन भएकाको शव जलाउने तयारी भएको कोषले जनाएको छ । रासस

प्रतिक्रिया दिनुहोस